कळूनही केला गुन्हा

शब्द होते सांधलेले, गीत होते बांधलेले

अंतरीच्या काळजाचा वेध होता घेतलेला

खेळ होता जीवघेणा , कळूनही केला गुन्हा । । १ । ।

सूर होते छेडलेले तान होती घेतलेली

स्वरलयींच्या कंपनाचा मेळ होता घातलेला

स्वप्न ते स्मरल्याविना , कळूनही केला गुन्हा । । २ । ।

डाव होता मांडलेला, जीत होती खेचलेली

उन्मादलेल्या गर्जनांचा माज होता चढ़विलेला

पट खेळुनी झाला जुना , कळूनही केला गुन्हा । । ३ । ।

भाव होता जोडलेला , जीव होता गुंतलेला

अर्थगर्भी स्पर्श आणि स्वार्थ होता साधलेला

स्मृती जागती पुन्हा पुन्हा , कळूनही केला गुन्हा । । ४ । ।

जन्म आहे जाह्लेला, चिन्तनाने गांजलेला

भार भूत भविष्य आणि वर्तमाना निसटलेला

पुसट त्या खाणाखुणा , कळूनही केला गुन्हा । । ५ । ।